Páskar

Gleðilega páska!
Það er mjög gaman að vera í páskafríi.
Eiginlega of gaman. Minnir mig á jólafrí. Orðið illt í bakinu af að sofa út og liggja bara og lesa. Var reyndar voða dugleg að læra í gær. Fór svo í matarboð til Margrétar og Baldvins. Það var bara ljúft fyrir utan smá tremma með lille drengen. Sumir voru eitthvað krumpaðir yfir því að þurfa að labba ALLA LEIÐ niður í Sólhlíð en það rann nú allt burt þegar þangað var komið. En á heimleiðinni þá byrjaði nú ballið. Við vorum auðvitað allt of lengi. Fórum af stað heim upp úr 11. og gangandi að sjálfsögðu. Þá rifjaðist krumpudæmið upp og drengurinn gekk grátandi og nöldrandi yfir þessari óhamingju að þurfa að vera að labba þetta svona ægilega þreyttur. Ég hef bara ekki upplifað meira drama lengi. Löggan keyrði meira að segja fram hjá en þeir létu nú vera að bjóða okkur far. Hefði litið mjög vel út að koma heim með barnið úr boði svona seint á laugardagskvöldi í lögreglufylgd. Alveg saga til næsta bæjar. Ég upplifði það að þeir sem sáu til okkar hefðu ályktað sem svo að nú hefði mamman verið á einhverju skralli með barnið úti í bæ og barnið væri svona óhamingjusamt yfir ástandi móður sinnar. Það hefði alveg getað litið svoleiðis út.
En þetta er liðin tíð núna og allir glaðir yfir páskaeggjum og lambi.
Á föstudaginn langa frömdum við mikil helgispjöll. Þ.e. unnum við listsköpun allan daginn. Á skírdag höfðum við sullað saman hveitijafningi og sprautað á léreft. daginn eftir komu Baldvin og Margrét og við unnum öll að því að mála yfir herlegheitin og í gær brutum við svo hveitið af og eftir varð þetta líka fína mynstur í málningunni. Allir mjög ánægðir með páskaframleiðsluna.

Jæja ætti ég að biðja Andra Hugo að hjálpa mér við að setja upp skilaboðakerfi á þessari síðu? Klink familí er ekki að standa sig í stykkinu.

Mig langar svo til að fá skilaboð. ;-) Frá ykkur mínir kæru vinir, ef einhverjir eru þ.e. a.s.

Jæja ég er farinn, verð að nota restina af fríinu!!

passið ykkur á bílunum!!!

hippar, latínudjass og hljóðklædd ljóðagerð

ja hérna hér. Hvað er ég að gera hér?
Ég fór á Hippaballið í Höllinni síðasta laugardag. Friður og ró þar. Mjög skemmtilegt ball og gott partí heima hjá mér áður. Gaman að sjá allt þetta fólk í rétta gallanum. Reyndar stundum aðeins of réttum göllum. Stundum átti maður erfitt með að þekkja fólk sem maður umgengst daglega. Sérstaklega fengu menn sem eru fátækir á hausnum eða hárlitlir, uppreisn æru. Urðu mun myndarlegri með kafloðnar hárkollur og gerviskegg. Gaman að því.
En þetta var frábært ball nema að það vantaði Andra Hugo alveg og ég tala nú ekki um Sóley systur hans...en það er nú bara indverskur draumur...álíka fjarlægur þ.e.a.s.

En það er nú það.

Annað kvöld ætla ég að fara í Akóges að hlusta á Latinjass af bestu gerð. Og ætla að bjóða litla djassgeggjaranum mínum með mér. Mikil spenna fyrir því...

Annars er svo sem ekki mikið að frétta. Ég fór í staðlotu í Listum í skólastarfi í KHÍ og performaði af mikilli innlifun, eða þannig. Flutti frumsamið hljóðklætt ljóð eftir sjálfa mig. Og gekk bara bærilega. Þetta tók á taugarnar fyrir fram en þvílikt athygliskikk sem kom á eftir.

Ég er að hugsa um að setja þetta ljóð á vefinn bara til að ergja ykkur sem lesið þetta og fá aðeins meira athyglistripp.

Þið verðið að ímynda ykkur hljóðklæðninguna: klaki sem brestur, klukkuspil, bjalla og fuglatíst...


Hvenær kemur vorið?

Klakann brestur brátt þol
til að bera þunga sólarinnar
brak
brestir
fuglasöngur
tíst tíst.

Regnboginn tekur á sprett
í
öldunni

Getur maður óskað sér í alvörunni?
Er nóg að sjá
regnbogann?

Má segja óskina?

Nei vina mín,
Haltu henni fyrir þig og þá mun hún rætast
Ef hún rætist ekki, sem hún gerir samt, getur þú verið viss um að vorið kemur að lokum.

Því það var óskin, ekki satt?



Jæja best að fara að sofa áður en maður fer að setja eitthvað ennþá persónulegra. Ef þið bara vissuð!!
Bless